Lo Congrès permanent de la lenga occitana ven de metre en linha la flame nòva version de son sit institucional, locongres.org.
Aquel cambiament es una etapa importanta dins la reorganizacion actuala de nòstres servicis numerics : en efièch lo Congrès a crescut dempuèi la primièra mesa en linha de nòstre sit en 2012 e son arquitectura s'averava èsser de mens en mens adaptada a mesura qu'editàvem de novèlas ressorsas, al ponch de pèrdre en legibilitat.
Coma nòstres usatgièrs o an pogut constatar, avèm donc operat aquestas annadas a un redesplegament complèt de nòstres portals en los rendent autonòms del sit institucional : Dicodòc (diccionaris, conjugueur, còrpus textuel), Revirada (traductor), Votz (sintèsi vocala), mas tanben los portals Lenga & Societat, Pedagogia o encara API pels desvolopaires an d'ara enlà de sits dedicats.
Amb aquela version novèla locongres.org torna a l'essencial, a saber èsser lo sit institucional de l'organisme de regulacion de la lenga occitana, ont son presentats nòstra organizacion, nòstras competéncias, nòstras principalas realizacions, los obradors en cors aital coma l'actualitat. L'accent es mes sul contengut, qu'es enriquit per de documentacion, dont las ressorsas lingüisticas de referéncia, e serà mai regularament actualizat.
Lo sit novèl es egalament pensat coma un portal cap a l'ensemble de nòstras ressorsas, amb un accès optimizat per tip de public e prepausant un flòc de servicis los mai pròches dels besonhs, qu'aquel siá pels simples utilizators, los professionals de la lenga, los ensenhants o encara los agents de collectivitats .
Enfin avèm egalament volgut establir un ligam mai dirècte amb nòstres usatgièrs qu'an d'ara enlà un ponch d'accès per nos ajudar : versament de còrpus, don de votz o, pels mai generoses, possibilitat de sostenir financièrament lo desvolopament de nòstras aplicacions e lor disponibilitat gratuita pel mai grand nombre.
L'obrador es pas pasmens pas acabat, amb las sortidas a venir de la Farga numerica (portal dedicat a las tecnologias de la lenga), Tèrmòc (basèt terminologica) e Lexicografia (interfàcia de consulta avançada de las donadas lexicalas e textuelles),
Entretant vos desiram una bona visita sus locongres.org !