Los lexics occitans publicats fins ara an conegut de fortunas divèrsas e se presentan sòus de las formas variadas : quantitativas, amb o sens definicions, publicats en format papièr o non, accessibles en linha o non… Es donc necessari de valorizar l'existissent tot en prenent en compte las caracteristicas tecnicas e politicas que la terminologia occitana encontrarà dins un pròche avenidor.
L'objectiu del tèrmòc es de permetre dins un primièr temps un accès unic d'aqueles lexics al public grand, gràcias a una mesa en coeréncia d'aquestes (format, còrpus, tractament de las variantas, etc.), e per l'integracion dins una basa de donadas comuna publicada sus internet.
L'essencial dels lexics compòrta, a partir d'un còrpus francés, dels tèrmes occitans eventualament amb lors sinonims, e aquò dins una sola varianta. S'agirà de lançar un plan d'extension dels lexics existents segon los principis d'accion del Congrès : valorizacion de las formas comunas e respècte de las variantas de l'occitan, tal coma definits dins lo diccionari elementari del Congrès.
Lo Congrès recep per son pòl Lenga & Societat de las comandas publicas de produccion e de valorizacion de lexics. Dins un lagui d'eficacitat e per tal de suscitar l'interès del public e de valorizar los camps lexicals investits, es considerat una mesa en situacion jos format audio e video dels tèrmes per concretizar e rendre pertinents las causidas terminologicas.