La representativitat
Lo Congrès es representatiu dels utilizators de la lenga occitana. Amassèt la diversitat de la demanda dels utilizators e la diversitat dels sabers sus la lenga. Aquel « saber » es segur present dins las universitats mas pas unicament, e es essencial que totes los qu'o pòrten sián representats dins l'organisme de regulacion. La representativitat deu èsser tanben geografica. Cal respondre a aquò amb la dobla preocupacion permanenta del respècte de la diversitat intèrna de la lenga occitana e de la reafirmacion de son unitat prigonda.
L'estabilitat
Lo Congrès deu fondamentalament obrar per l'estabilitat de la lenga occitana. Aquí perqué sas intervencions devon aver per objectiu de tractar de questions encara non resolgudas, e non de cambiar las causas ja establidas. Aquelas questions se situan sustot dins los domenis de la neologia o encara de l'onomastica (toponimia, antroponimia, etc.). L'organisme de regulacion deu saber aculhir e portar una responsa als besonhs exprimits pels utilizators, que sián individuals o institucionals.
La cooperacion
Lo Congrès es un servici partejat entre sos membres : es un esplech cooperatiu que mutualiza las competéncias e los mejans, e que valoriza las realizacions de cadun.
La collégialité de las decisions
Una institucion de regulacion necessita, de la part de sos participants, l'acceptacion de qualques règlas elementàrias e primièr la de la collégialité de las decisions. Los membres de l'organisme son donc tenguts solidaris per las decisions presas collectivament dins son sen.
La difusion de l'informacion
Lo Congrès met en plaça los mejans necessaris per tal d'assegurar la mai larja difusion de las informacion e de las produccions al près dels utilizators. Sas decisions son integradas dins d'espleches de referéncia (diccionaris, gramaticas, cartas sus supòrt papièr e numeric, etc.).
L'associacion
Lo Congrès trabalha en associacion amb los poders publics e las collectivitats territorialas que se vòlon actors dins lo domeni de la lenga.