Fòrt de sas missions estatutàrias, l'equipa del Congrès a desvolopat tres domenis de competéncias :
- las nòrmas lingüisticas occitanas, realizadas amb lo supòrt dels Conselhièrs scientifics del Congrès e difusadas al près del public per diferentas òbras o supòrts de referéncia : diccionaris, basas lexicalas e toponimicas, tablèus normés, etc.
- lo Tractament Automatic de las Lengas (TAL) es un domeni de competéncia pel qual lo Congrès, amb lo supòrt de sos partenaris scientifics e tecnics, es d'ara enlà reconegut coma referent per la lenga occitana. Es dins aquel encastre que lo Congrès condutz mantun programa operacional e desvolopa diferents espleches e ressorsas per las tecnologias lengatgièras : traduccion automatica, tecnologias de la paraula, analisi semantica, etc.
- Lo Congrès dispausa dins son sen d'un pòl dedicat a la difusion de la lenga dins la societat (al près dels particulars, entrepresas, collectivitats). Lo pòl Lenga e Societat (Lenga e societat) prepausa mantun servici en socializacion lingüistica, dins los domenis de la traduccion, de la terminologia, de la toponimia e de la sensibilizacion lingüistica.