L'institucion

Lo Congrès permanent de la lenga occitana es l'organisme academic interregional de regulacion  de la lenga occitana.

Lo Congrès permanent de la lenga occitana es una institucion independenta representativa dels actors e dels utilizators de l'occitan que vèlha al respècte dels dreches fondamentals de la lenga e a la promocion de son usatge. Es l'esplech comun de sos membres al servici de totes. Sostengut pel ministèri de la Cultura-DGLFLF e las collectivitats territorialas, aspira a la plena reconeissença de son autoritat scientifica pels Estats de l'Union Europèa concernits per la lenga occitana, e primièr França.

A per tòca de contribuïr a la vitalitat e al desvolopament de l'occitan, apelat tanben lenga d'òc, en trabalhant a sa coneissença e a sa codificacion per la produccion dels espleches pertocant los diferents aspèctes de la lenga (lexicografia, terminologia, neologia, fonologia, grafia, gramatica e toponimia). Agís segon de principis d'accion tals coma lo respècte de l'unitat e de la diversitat de l'occitan, l'estabilitat, la representativitat de las regions lingüisticas del territòri d'Òc, la collégialité de las decisions e la difusion de l'informacion. Lo Congrès inscriu son accion dins la continuitat de las òbras istoricas de normalizacion de la lenga e utiliza dins sa comunicacion e sas produccions la grafia dicha « classica ».

De per son dardalh interregional e transfrontalièr, lo Congrès es un ponch de convergéncia de las energias e de la produccion de coneissenças. Vertadièr « Acadèmia numerica de la lenga », l'institucion a l'ambicion - gràcias a son organizacion, sas associacions e sas tecnologias - de produire las ressorsas e los espleches permetent de respondre als enjòcs de difusion de la lenga dins la societat modèrna.