Lo Congrès permanent de la lenga occitana e lo laboratòri CLLE-ERSS (CNRS / Universitat Tolosa-Jean-Jaurés) an iniciat una associacion qu'a per mira de la creacion d'un lexic dobèrt de las formas plegadas de l'occitan (LOFlOc).
Aquela iniciativa se fa dins l'encastre de Restaura (Ressorsas informatizadas e Tractament Automatic per las lengas Regionalas), un projècte ANR (Agéncia nacionala de la recèrca) que vei s'associar CLLE-ERSS (universitat de Tolosa), LESCALP (universitat d'Amiens) e LILPA (Universitat d'Estrasborg) a l'entorn del desvolopament de las ressorsas informaticas e dels espleches de tractament automatic per tres lengas regionalas de França : alsacian, occitan e picard.
Dins lo linhatge del Morphalou pel francés o del Lexic Obert Flexionat de Català, Lofloc serà un lexic de las formas plegadas d'un lema, a saber una basa lexicala monolingua comprenent una lista de mots occitans amb la categoria gramaticala (tip, genre, nombre, etc.), las formas plegadas (femenin, plural, conjugason, etc.) e la varietat.
Inscrich demest los desvolopaments prioritaris de la fuèlha de rota de desvolopament numeric de l'occitan, Lofloc es una ressorsa indispensabla a l'anotacion dels còrpus textuels, mas egalament a la creacion d'aplicacions numericas talas coma la sasida predictiva e la correccion ortografica.