Lo 20 de març darrièr s'es amassada al Conselh generau d'Aran a Vielha (val d'Aran/Catalonha) l'equipa occitana de LINGUATEC IA, un consòrci transfrontalièr d'institucions e de centres de recèrcas dedicat al transferiment de coneissenças e al desvolopament de las tecnologias de la lenga per l'aragonés, lo basc, lo catalan e l'occitan.
Cofinancé pel POCTEFA (fonzes FEDER), aquel programa triannal permetrà de melhorar las tecnologias de traduccion automatica, de sintèsi vocala e de reconeissença vocala per l'occitan, l'accent serà mes sustot sus las ressorsas en aranés e l'intercompreneson entre l'occitan e lo catalan.
Aculhits oficialament per Maria Vergés, Sindica d'Aran, a la quala es estat remés un exemplar del Diccionari del bearnés e del gascon modèrns de Simin Palay (coedicion de Reclams e del Congrès permanent de la lenga occitana) los representants de l'universitat de Lhèida, de l'universitat de Tolosa e del Congrès permanent de la lenga occitana an atal presentat lo programa e los desvolopaments previstes als tecnicians del Conselh general. La reünion a puèi pres la forma d'un talhièr al cors de lo qual los partenaris an detalhat, planificat e organizat las diferentas òbras de la partida occitana del programa pels meses venents.
Dins la continuitat del precedent LINGUATEC, qu'a vist la naissença de Revirada (traductor automatic) e de Votz (sintèsi vocala), LINGUATEC IA a egalament per ambicion de respondre als usatgièrs de la lenga occitana en lor prepausant de tecnologias lingüisticas de poncha e d'atrapar lo retard de l'occitan dins aquel domeni.
Podèm pas que nos regaudir de l'alargament del quadre partenarial a d'institucions de l'espaci aranés e catalan. L'aranés, coofficiel dins la Generalitat de Catalonha, es la forma occitana dispausant actualament de mai naut nivèl de reconeissença publica, obrissent de novèls usatges e novèlas perspectivas pels espleches desvolopats aital coma per las ressorsas constituïdas (sustot dins lo domeni de la terminologia). Enfin, la connexion amb lo catalan es egalament un enjòc de talha : lo nivèl naut d'aisinas d'aquela lenga dins lo tractament automatic de las lengas, sa proximitat lingüistica e sa coexisténcia institucionala amb l'occitan permeton de considerar de passar un pompidor novèl.
LINGUATEC IA es un programa triannal comprenent un flòc de desvolopament, dont una plataforma lingüistica de transcripcion automatica de videos dintra lengas dels Pirenèus, pel qual vos tendrem regularament informats per nòstra letra de ligason e las rets socialas.
