Conselh de la lenga occitana
Aquel article cita pas pro sas fonts ().
Se dispausatz d'obratges o d'articles de referéncia o se coneissètz de sits web de qualitat tractant de tèma abordat aicí, mercé de completar l'article en balhant las referéncias utilas a sa vérifiabilité e en los ligant a la seccion « Nòtas e referéncias ».
En practica : Qualas fonts son esperadas ? Coma ajustar mas fonts ?
Pels articles omonims, veire CLO.
| Fondacion |
|---|
| Sigla |
CLO |
|---|---|
| Zòna d'activitat | |
| Caracteriza | |
| Forma juridica | |
| Objècte social |
Codificar la lenga occitana dins sa nòrma classica e practica. |
| Domenis d'activitat | |
| Sèti |
Niça (dempuèi lo ) |
| País |
| Sit web |
|---|
| RNA |
|---|
Lo Conselh de la lenga occitana o CLO (en occitan : Conselh de la Lenga Occitana) es l'organisme responsable de la codificacion de l'occitan e, mai precisament, de la gestion e del desvolopament de la nòrma classica de l'occitan. Lo conselh es estat fondat en 1996-1997.
Lo vam de la debuta[modificar | modificar lo còdi]
La motivacion per fondar lo CLO es eissida de la crisi e del rambalh que tocavan la nòrma classica dempuèi 1975. En teoria, la nòrma classica s'apièja sul trabalh de Louis Alibert expausat dins sa Gramatica occitana segon los parlars lengadocians de 1935, puèi sus la gestion d'aquela nòrma per l'Institut d'estudis occitans (IEO) a partir de 1945. Pasmens, a partir de 1975, l'IEO s'a daissat desvolopar dels practics antinormatives o contradictòris dins son sen, dins sas pròprias publicacions, e a pas pogut garantir la difusion d'una nòrma establa e univòca.
L'iniciativa de la fondacion del CLO èra dobla :
- es venguda d'una part del Gidilòc (Grop d'Iniciativa per un Diccionari Informatizat de la Lenga Occitana) ;
- e d'autra part, del Sector de Lingüistica de l'IEO . Los dos organismes an manifestat la volontat comuna de trobar de solucions al rambalh normatiu.
La composicion del CLO es estada facha en convidant d'especialistas reconeguts e dels actors culturals de divèrsas sensibilitats, segon lo principi de la cooptacion. Puèi, de membres novèls son dintrats al CLO e d'autres ne son partits.
Las primièras amassadas de 1996 (informala, a Tolosa) e de 1997 (fondacion oficiala del CLO, a Tolosa, seguida per una autra amassada a Nimes) an abotit a una seria de recomandacions per resòlvre las divergéncias d'ortografia las mai correntas, qu'afectavan l'ensemble de l'occitan. L'amassada de Nimes a precisat egalament qualques principis los mai especifics del provençal, del niçard e del vivaroalpenc. N'es sortit un document public que resumissiá las solucions.
Las annadas seguentas, de 1997 a 2002, lo CLO a organizat d'autras amassadas regularas. A adoptat una seria de solucions per resòlvre d'autres problèmas recurrents, pertocant pas solament l'ortografia mas tanben la nòrma orala.
Las dificultats[modificar | modificar lo còdi]
Pasmens, de tensions son nascudas dins las annadas seguentas quand lo CLO a començat de voler resòlvre de problèmas suplementaris. Lèu, una partida dels actors culturals (de còps, d'unes membres del CLO) se son pas mostrats plan favorables per trobar de solucions consensualas o per acceptar las decisions de la majoritat dels membres del CLO.
Lo Gidilòc, un dels cofondators del Conselh, a contunhat sa collaboracion scientifica regulara dins las activitats del CLO.
L'IEO , l'autre cofondator del Conselh, aviá mostrat primièr una actitud de partenari actiu e constructiu dins lo CLO. L'amassada generala de l'IEO de 1998 aviá votat la reconeissença e l'adopcion de las preconizacions del CLO. Mas a causa de las tensions creissentas, en 2001, la direccion de l'IEO a cambiat d'actitud e a prepausat de sortir del CLO per fondar un organisme concurrent que seriá nommat Acadèmia Occitana. Fin finala, a partir de 2002, l'IEO e lo CLO an tengut divèrsas reünions de trabalh per trobar un acòrdi renovelat de collaboracion e de reconeissença mutuala, mas las negociacions an pas abotit a cap d'acòrdi. Dempuèi 2002, aquelas tensions divèrsas an ralentit lo ritme de trabalh del CLO, que pasmens contunha d'existir juridicament coma associacion.
Represa de las activitats en 2021[modificar | modificar lo còdi]
En genièr de 2021, lo CLO a représ sas activitats per tal de trobar de solucions concrètas, de cap a la persisténcia dels usatges incertans. A explicat sa reactivacion dins un comunicat.
Uèi, las preconizacions del CLO son seguidas per una partida del movement occitanista, perque i vei una solucion utila per desvolopar l'occitan d'una faiçon mai ordenada, especialament en pedagogia. Sustot, lo CLO es reconegut oficialament pel Conselh general d'Aran (e donc per l'Oficina de Foment e Ensenhament der Aranés) dempuèi 1999, per l'Associacion Internacionala d'Estudis Occitans (AIEO) dempuèi son congrès de Tolosa en 1997, pel Gidilòc qu'es membre fondator del CLO, e per una partida dels ensenhaires, formators e organismes culturals. D'unes libres, CDs e DVDs precisan, dins las primièras paginas, qu'aplican la nòrma del CLO.
